創辦中國會、上海灘嘅鄧永鏘，去年獲前事頭婆冊封爵士，佢對呢個貴族身份當然甚為自豪，上now節目《星期日大班》時，諷刺其他爵士回歸後為顯示政治正確，唔敢用爵士銜頭，好似寶哥哥、煲呔咁，都將個勳銜收收埋埋，唔敢畀人知。
司機客串發哥名作
鄧爵士又爆咗個鮮為人知嘅秘密，話說多年前佢長住北京，香港個司機唔使接送老闆好得閒，竟然唔收錢客串做臨記睇明星，喺發哥套《英雄本色》中做茄喱啡，仲揸埋老闆架房車上境，喺電影中送殯場面出鏡。
鄧永鏘一直被蒙在鼓裏，後來到發哥請佢睇首映，見到自己架車上鏡先知道。名貴房車變靈車，真係大吉利是，所以鄧永鏘速速賣出架車。
做得貴族，鄧永鏘自然認識唔少皇室成員，佢話做朋友講緣份，最緊要係大家相處時輕鬆啲，多啲幽默感。佢話有錢佬成日驚人謀身家，所以要做朋友千祈唔好俾人覺得你另有所圖，咁就易傾偈得多。不過佢承認家香港所謂上流社會啲人好唔掂，講嘢內容不出三幅被，講錢、講車、講錶，係咁多。
話不投機半句多，鄧永鏘話為怕悶死，近年都減少應酬，同太太講少啲出去食飯，冇必要唔去ball。因為搞成晚又悶又攰，攞苦嚟辛，何必？