上個月最後一刻冇咗盟主位，仲要畀最後一刻過我頭嘅蘋果波神，笑我貼瑞典波屎過挪威波；講真挪威波好處在勝負未必易揀，但總會開個「大」畀你中，周日特林素主場對奧特格寧蘭，開硬「大」！
小弟在另一欄目已推介特林素呢場開「大」，不再多談，求賠率當然向總入球進軍，特林素今季6場聯賽開咗3次6球，奧軍亦開咗2次，總入球[6球]有14倍，當然要得過，驚佢哋兩班波入得興奮得滯，補埋個16倍總入球[7+]冇蝕底。
追燕豪芬2:0、3:0
荷甲周日就有9場波畀大家揀，近期當旺嘅燕豪芬，值得再追；呢支昔日班霸為咗趕上些微第2位機會，來季可踢歐聯，主場對中游分子奈梅亨又點會留手；燕豪芬畀我嘅感覺，雖然冇阿積士、AZ等咁強攻力，但勝在打法穩陣，近5戰全勝中，有4次開2:0波膽，今次再追2:0外，補埋3:0波膽就啱數。
穩中求冷嘅配腳方面，英冠周日就煞科，修咸頓呢支踢過英超嘅球隊，竟然來季英甲見，諗番佢地都出過舒利亞、拿鐵斯、比亞堤、禾確特等球星，博佢降班前都有一番傑作，作客打低森林，串埋呢個3.5倍客W。
文：牽牛