范太唔做立法會議員，退下主席職位，可能好慶幸自己走得快。佢噚日接受商台訪問時話，新一屆議會發生議員掟蕉事件，或者干預官員發言，都係非常難處理嘅事，佢不在其位，好難評論主席曾鈺成處理手法係咪適當，不過范太補多句話對阿曾有信心，相信佢有能力搞掂呢啲事。
晉身全國人大常委嘅范太又話，每次開會審議法例，都會提出代表香港嘅意見，而做人大常委，佢認為最重要係勤力，因為人大常委每次開會都會審議多條法例，但往往要開會前幾日先收到討論文件，所以要好專注睇文件內容先得。
現時人大常委閉門開會，范太話相信總有機會開放會議，但需要一定過程，亦唔好將香港制度套入內地，因為未必合乎實際情況，佢又話部份人大常委喺閉門會議上發言激烈，一旦公開會議大家可能有避忌，反而失真。