你有沒有用相機、舉起V字手勢扮可愛自拍？你是否曾經向男朋友說過「你唔買畀我即係唔愛我啦？」如果有做過，你擁有很高的港女潛質。
你有沒有將公事包斜孭上身？公事包上又是否有一個女朋友迫你掛上的公仔？假若有，你絕對符合港男的條件。近日港男港女的話題熱爆，現在就讓詹瑞文揭開港男港女的真面目，這種風氣蔓延下去，遺害的只是香港的下一代。撰文：李珮洳
兩年多前詹瑞文已構思於今年年尾演出一個關於港男港女的舞台劇，早前《星期日檔案》探討港男港女的節目推出後，成為全城熱話，阿詹與林奕華決定提早推出舞台劇《港女發狂之港男發瘟》。
阿詹有感近年的港男港女問題日益嚴重，他覺得長此下去，男女之間的關係及社會價值觀只會變得嚴重量化及物化，因為現時的男女每一天都在評核對方，由以前的父系社會當道變成母系社會當道。
源自港爸港媽
阿詹表示港男港女是來自港爸港媽，上一代的價值觀深遠地影響着下一代，他舉了一個例子：「當你睇劇集，個女帶男朋友返屋企，阿媽唔會問個女拍拖拍得開唔開心、佢愛唔愛你？第一個問題梗係問個女你男友做乜嘢㗎？」現時男女之間就是以物質來衡量愛不愛？男女心目中都有各自的一張清單去評核對方計分，阿詹說：「首先講吓女方點去計自己男友先啦，相信好多港女成日都會講『你唔識做人男友㗎，你梗係要我啦』、『你唔買畀我即係唔愛我啦』、『你見我着到咁，你自己醒目着好啲啦，唔係要我提你呀？』好多嘢都係老奉㗎，你越愛我對我付出嘅錢就要越多。
「你估家仲好似以前咁呀？有情飲水飽，打個電話傾兩句、畫張卡寫兩隻字就到女朋友開心呀，你冇個名牌手袋喺手都唔得，好多嘢都係物化，對另一半多咗挑剔、少咗欣賞。即係家啲人去投個車牌，又或者喺鬧市買個大廣告板去同女友示愛，呢啲行為先係叫做愛對方。」
圖拖長青春期
阿詹又發現港女的另一個特性就是特別賣力去延長自己的青春期，不論是打扮或言行舉止，他續說：「其實好多港女都係出生於七十至八十年代，即係20至30幾歲嘅女性，呢個年紀嘅女仔大部份只係想得到一個字，就係kawaii。打扮要係日韓風、要可愛、要Ｖ字手勢自拍，講嘢要用把好可愛嘅聲，見到乜嘢都話『乜嘢嚟㗎？我唔識呀！』我最勁見過有一對男女喺街嗌交，個女仔係咁一堆粗口飛埋去個男友度。」
至於港男，很多人都誤解了是電車男或是御宅族，在阿詹心目中以上兩者都是港男的分支，簡單來說是secondline，他近年見港男的打扮都是如出一轍，造型從日本雜誌中有迹可尋，他表示：「以前公事包係拎喺手，家啲港男鍾意將個公事包斜孭上身，最抵死係袋上會掛住隻公仔，我估一定係女友迫佢掛住。仲有佢哋着衫好鍾意反領，同埋無時無刻都chok樣，以上種種都係外形上嘅特質。」
激發男女反省
由於港男港女充斥於全香港，如果這種物化、量化再蔓延下去，其副產品就是一班港B。阿詹表示港男港女是可以改變的，所以他希望港男港女於6月入場欣賞完《港女發狂之港男發瘟》，有所反省，早日杜絕這種風氣。
責港男依附求存
阿詹親身經歷與港男對戰的一幕，他認為港男最嚴重的病態是沒有主見，他邊笑邊說：「有一日我揸車倒後時撞到後面架車，我落車睇完兩架車都冇事冇花，跟住有個廿幾歲嘅男仔落車叫我賠錢。我咪問佢要幾多錢，佢首先望吓車上個女友，之後同我講要打電話問阿爸，我嗰吓真係呆咗。咁大個仔仲要問阿爸，最後佢話要我賠50蚊，我當然唔睬佢啦，點解家啲男仔咁冇主見，任何事都要依附別人嘅意見。」
