【本報訊】A小姐與魔鬼醫生羅文友的醫患孽緣擾攘十多年，羅才被醫委會停牌。其實A小姐早於七、八年前已向聯合醫院投訴，院方卻不予理會。她向記者憶述時失聲痛哭，「咁大間醫院都冇人幫我，係咪等病人死先肯幫？」
羅上司叫她搵醫委會
她向記者出示的相片包括多包藥丸，她稱此藥屬羅文友所有。羅除了用藥迷暈病人外，本身亦有服用精神科藥物的習慣，在家中長期違規存放大量精神科藥物。
A小姐曾把這些藥物交予羅的上司、聯合醫院精神科主管姚家聰，但姚不予理會，「佢（羅）將醫院啲藥偷返嚟，好大批，用兩個紅白藍膠袋裝住。我報警，警察淨係影咗相，話做唔到嘢，叫我拎去醫院。我即刻去搵姚家聰，佢退番啲藥畀我，叫我自己攞去醫務委員會。」
社區組織協會病人權益幹事彭鴻昌指，A小姐向醫院多次投訴不果後，07年首次向醫委會投訴，當時該會曾向聯合醫院求證，但院方否認事件，遂沒有跟進個案。A小姐去年再次向醫委會投訴，並呈交其親密錄音對話，醫委會才受理。A小姐與彭鴻昌的說法，明顯與姚在聆訊上稱立即處理A的投訴之說有矛盾。
姚家聰兼任九龍東精神科部門主管，先後兩次出席聆訊，態度極不合作。經醫委會成員多次追問，才突然爆出A曾向他透露與羅的同居關係，又沒有按要求提交查閱病人病歷指引，被醫委會法律顧問批評表現令人失望。
聯合被指沒深入調查
A小姐說，「佢當時只係想保住飯碗，唔會保住我，淨係叫羅文友辭職。」聯合醫院知悉事件也沒有深入調查，只建議羅辭職了事。彭鴻昌批評，事件反映聯合醫院醫醫相衞，院方初期得悉事件時，沒即時告知醫委會，欲自行解決，「醫院唔信病人，又唔幫佢報警。唔保護病人，反而保護醫生。今次畀大家一個教訓，唔好抹煞精神科病人可信性，要認清事實。」