台灣偶像言承旭（Jerry）嚟緊會同S.H.E.成員Ella首度合作，拍攝偶像劇《就想賴著你》，噚日佢哋喺台灣出席記者會。劇集未開拍，Ella已經使出渾身解數討好Jerry，親熱咁叫佢做旭旭，又讚佢係「溫柔的天王」，Ella仲唔怕醜叫Jerry：「你要小心不要愛上我喔！」不過熟識Ella嘅人都知佢一向鍾意靚仔，反而擔心佢會愛上Jerry。
片酬1小時16萬
Ella第一次同Jerry合作，佢大爆劇中兩人有場好勁但又好唔正常嘅接吻戲，佢好鬼期待。Ella拍戲成日會同男角傳緋聞，問佢今次會唔會日久生情？Ella對住Jerry話：「你要小心不要愛上我。」Jerry聽到即笑笑口話：「能跟這麼可愛的女生傳緋聞滿好的。」
Jerry接呢套劇，除咗因為鍾意劇本外，又因為今次嘅製作人柯宜勤，係當年搵Jerry拍第一部劇集《麻辣鮮師》嘅伯樂，恩人開口，Jerry梗係第一時間答應。據悉Jerry當初以2,000蚊拍每集90分鐘嘅《麻辣鮮師》，但家傳佢拍60分鐘大約16萬港元，身價暴升，難得製作人柯宜勤依然話：「很值得。」