保釣行動委員會原定本月6日至10日去釣魚台宣示主權，但係未出發已經遇到風浪，12名保釣成員噚日喺香港準備上釣魚台二號出發，忽然遭海事處職員截停，指呢艘船只可打魚不能保釣，更加唔可以載客遠航，總之行人止步。
保釣大業竟然俾個「蚊滋」咁大嘅部門阻撓，一班保釣猛將非常勞氣，成員之一嘅阿牛踢爆海事處可能係受中聯辦唆擺，事關佢哋出發前夕，中聯辦曾經勸喻佢哋放棄出發，以免影響近日中日友好和諧氣氛，保釣勇士sayno，中聯辦退而求其次，建議佢哋飛去台灣上船，屆時中聯辦鞭長莫及，眼不見為乾淨，就唔理得咁多咯。同中聯辦行得埋，唔代表有運行，阿牛明冇？