《國產零零漆》話俾我知！大俠唔一定係靚仔，《保衞奇俠》再話俾我知，超人都有愛露體！忠奸道係咪一條線劃得咁清楚，真係未必想當然；PS3新大作《inFAMOUS》，你要殺人放火做末世魔君，甚或「救人七命」做救世主亦得，兩邊故事、兩個劇情任你走到尾；仙道、入魔完全自選Channel，真係遊戲史上幾破格系統！
記者：許福合
爆炸突變恐怖分子
睇封面主角，想當然會認為並非善類，其實這位人稱Cole，原本只係一名安份工作嘅送貨員，生活平凡，但一次工作途中遇上爆炸，破壞規模非常大，震撼整個國家。
Cole雖大難不死，但並無後福，仲無厘頭俾人誤認為炸彈狂徒，成全國通緝犯！同時，Cole發現自己竟意外獲得超能力；呢個時候身處嘅帝國亦陷入大亂，要如何運用力量，為自己洗脫嫌疑？定係大開殺戒、殺晒屈你係壞人嘅蠢蛋？故事發展就等你決定。咩話，故事複雜怕睇唔明？《inFAMOUS》會推出中英文合版，有中文字幕，打打殺殺同時都可了解劇情。
殺人救人兩邊劇情
當進入遊戲後，會發現版圖世界都使用開放式設計，簡單嚟講，就係睇得到、就去得到，完全可讓用家當一個3D世界冒險，當見到建築物、高樓大廈，甚至一支長杆，都可以嘗試爬上去，隨時可能發動突發事件及劇情，兼出現加分或戰鬥選項。
講番遊戲最特別之處，係新加入「善惡值」系統，胡亂殺人開火自然會變邪惡，即使見死不救、戰鬥時禍及無辜，同樣會傾向邪惡一邊！
相反，保護平民或完成特定事件都會提升「善惡值」，成為人民英雄。善惡值唔只代表人物聲譽，同時會影響到劇情發展、特殊事件發動等，所以救人同殺人兩種玩法會引導向不同劇情。
三身視點玩超能力
除咗特殊善惡系統，戰鬥時操作其實與射擊遊戲相似，不過視點會使用第三身角度，而且好少見主角會拎起槍炮，事關主角Cole已經變成X-Men、蜘蛛俠一樣，具備超能力，例如最常用攻擊招數，就係電力系招式，可以發動電流脈衝打暈敵人，擲出會爆炸嘅電球，又可利用磁浮力場來衝刺或飄浮。
更勁嘅係可吸取物件，呢招殺人同救人時都相當好用，同一道理，亦可利用吸力學似蜘蛛俠一樣吸附大樓外，讓玩家發揮全方位場景嘅設計。而且隨住遊戲進行，招數更會因應純熟度、戰鬥技巧等不斷進化，亦令可玩性提高不少。
Profile
主機：PS3
開發：SuckerPunchProductionsLLC
類型：動作冒險
遊戲人數：1人
推出日期：5月
售價：約$350
查詢：SONY（23452966）
