民建聯18位副發言人經過重重篩選先脫穎而出，但原來入閘唔代表上到位，18羅漢下星期三會集體見傳媒，八方聽聞佢哋正式亮相前要接受地獄式集訓，有人要上堂練習英文，亦有人要惡補口才，最特別應該係民記特別安排一個模擬記者會，搵人扮記者提出尖銳問題，再教路佢哋如何回應，減少出醜機會。
18羅漢已分配所屬政策範疇，身兼副主席嘅張國鈞負責政制事務，師傅係前副主席葉國謙。政制呢家嘢好敏感，搞得唔好隨時中箭，表現好卻可能係上位捷徑，據知張國鈞主動請纓負責政制，可見佢都好進取。唔講唔知，張國鈞同社民連新秀季詩傑原來係大學同學。