成龍自己心甘情願做奴才淪為笑柄，前高官陳太寫blog，話都有留意國際巨星嘅謬論，認為咁講好奇怪，因為香港人素來守法，50萬人烈日下上街遊行都秩序井然，何來好亂？而且從事電影業應該重視創意天馬行空，最怕規管，成龍係電影人，而且本身私生活都唔鍾意受約束，竟然要求被管，令人費解。
叫煲呔向中聯辦說不
同樣令人難明嘅係中聯辦有法不依，研究部部長曹二寶表明要組成第二支管治隊伍，陳太話咁講係違反《基本法》同一國兩制，中央駐港機構亦有干預香港自行管理事務之嫌，但令佢最失望嘅，係港府對此反應太軟弱，特首煲呔要有勇氣企出嚟向中聯辦說不。
煲呔見到北大人時誠惶誠恐，又點敢隨便說不，北京、香港關係唔係咁簡單，同男女感情一樣咁棘手，有個女仔盜用老闆信用卡買跑車畀男友，咁都做得出，有網友建議陳太話吓呢啲後生仔女，陳太話靠金錢物質維繫感情唔會長久，佢建議組成「手袋黨」，女仔有心事可以同一班同性朋友傾心事，宣洩情緒，冇咁易鑽牛角尖做儍事。