就算世衞提升豬流感警戒級別，都無阻股市照爆霹靂升勢，港股昨一度大升超過600點，收市仍錄得564點升幅，報15520，成交急增至709億元。股海氣勢超勁，星俠昨日都隱約覺得個市唔可以睇淡，好友果然有料到。
若然片面以03年沙士一「疫」來分析家陣股市，似乎已經唔可行，否則個市咁升法，股友搵乜來自圓其說？不過所謂踢波係「逐場計」，之前賽績唔可以全盤作準，股市升跌亦係「逐日計」，家陣大市連升兩日已累升近千點，下個禮拜就係5月份首個交易日，唔知港股係咪可以一口氣再升，抑或過完呢個假期「冷河」之後就暫時唞唞？
1年目標8.5元
近期股海熱話除了係豬流感疫情外，最多人講係上海及台灣兩大板塊概念股，事實上，該兩大板塊股份近日表現都算不俗，好似滬杭甬（576）已連升多日，昨日更一度升至6.80元，尾市有回吐令升勢收窄，但仍升5.5%，收報6.67元。滬杭甬走勢咁勁，一方面係炒上海概念，另外疫情於本周初被市場「放大」，唔排除有資金短線湧入以求避險，兩因素雙管齊下將股價推高。
現在距明年上海世博尚有一段時間，相信上海概念仍有排炒。滬杭甬短線累積升幅唔小，待回落至6元才吸納，1年目標8.50元。
方星俠