小甜甜千億爭產案真係好戲連場，最新一幕係噚晚公演，以王德輝、龔如心愛情故事為藍本嘅木偶劇《天長地久》。木偶劇喺尖東華懋戲院上演，開場前華懋請來唐偉琪唱《小甜甜》，又有單紫寧模仿已故鄧麗君唱金曲，首首歌都係小甜甜生前至愛，唱俾邊個聽，唔使多講。
木偶劇獲「官方」認可
呢套木偶劇以像真為賣點，王、龔一對木偶同真人一樣咁大，望落栩栩如生，華懋更特別搵人扮演小甜甜出場，喺場內行來行去，加上似到十足嘅山寨鄧麗君，戲院內又一片煙霧瀰漫，咁樣睇戲，真係好鬼有氣氛。
華懋話一連20場木偶劇售票反應理想，噚晚首場坐滿大半場約有200多人，觀眾多數係長者同中年人士，有冇華懋員工嚟重溫老闆風采不得而知。名導演黃百鳴、高志森都有捧場，兩人話係華懋老臣王禮泉朋友。
八方問過幾個觀眾，都係話朋友送飛先嚟睇，純粹好奇，可惜現場氣氛實在太異樣，未正式開場，唔少觀眾已經頂唔順，有人瞌埋眼，亦有人擰歪面，應該都係唔想見到個疑似小甜甜，做到中場，陸續有人起身鬆人，有人話悶，另一個人則面青青匆匆離開。
多位華懋高層則睇足全場，售樓部總經理吳崇武、租務部主管譚維冠完場時不發一言，似乎感慨良多；龔如心兩個妹欣心、中心都有到場，細佬仁心冇到；中心承認龔家有就故事內容俾意見，間接承認呢套木偶劇獲「官方」認可，內容靠得住，又話雖然如心已逝世超過一年，但仍然好掛住家姐。
木偶劇內容講述小甜甜同王德輝多年嚟都好恩愛，一直認為新抱不守婦道嘅老爺王廷歆冇到，王禮泉冇直接講有冇請老爺，只係話好難聯絡老人家。
呢套木偶劇的確唔係人人啱睇，至少陳振聰就冇眼睇，事關套劇唔止係紀念王德輝、龔如心咁簡單，更重要係要透過歌頌兩夫婦情比金堅事迹，幫小甜甜被指紅杏出牆、同風水師有染大平反，只要成功重塑小甜甜深愛丈夫形象，佢將身家留俾外人自然難以說得通，但講到底木偶只係扯線公仔，唔能夠上庭作供，爭產官司仍然有排打。
mailto:[email protected]