現年38歲嘅洪欣早前宣佈下月會同27歲內地演員張丹峰拉埋天窗，佢趁婚前仲一鋪博盡，為美容集團做代言人，並拍攝新一輯廣告，一共有四個造型，其中有三點式泳裝，大騷性感身材。佢嘅身材一啲都唔輸蝕畀啲後生女，睇嚟洪欣人逢喜事精神爽，拍攝時仲鬼咁風騷，實行婚前大解放。
老公讚皮膚似BB
今次拍攝除咗有十幾個工作人員，仲有一個重要貴賓，就係洪欣嘅未來老公張丹峰，佢特登嚟現場監督兼打氣，峰哥就梗係緊張啦，未來老婆咁sexy，當然要親自嚟到實。
洪欣每當影完一輯相，就會同峰哥一齊睇，左揀右揀，鬼咁甜蜜。狀態大勇嘅洪欣話：「我係因為有愛情滋潤，人咪開心囉，加上呢排有個美容療程，效果更顯著。」咁又係嘅，就嚟做新娘一定要以最靚最索嘅樣見人。
至於實未來老婆嘅峰哥，睇見索爆老婆忍唔住大讚：「佢啲皮膚好似BB咁滑手。」馮仁昭都戥峰哥開心，洪欣呢個老婆又靚又識搵錢，真係嗒得杯落。