獨立於政府嘅法定機構真正山高皇帝遠，紛紛變成冇王管獨立王國，平機會俾審計署揭發多筆糊塗賬，主席鄧爾邦被喪插浪費公帑，平機會委員醞釀逼佢辭職，另一個法定機構私隱專員公署都十分可疑，私隱專員吳斌噚日卻話未驚過。
謹慎花錢唔會亂出差
吳斌話私隱專員公署每年獲撥款少過平機會一半，暗示冇咁多錢可以俾佢亂使，所以花錢非常謹慎，唔會隨便出差，佢上任以嚟每年平均只出差五次，一年外訪支出大約14.4萬元，呢個價錢，平機會隨時一次使凸。
吳斌又話，公署每次出差連埋佢都只得兩個人，唔會成村人出發，更強調與同行職員睇齊，自己只係住宿最基本標準房，唔住總統套房；今年2月去新加坡開會，佢同職員兩個人都係用飛行哩數換經濟位機票，慳番機票錢，總之專員同職員平起平坐，住平房、坐平機，公平過平機會。
平機會搞活動動輒花幾十萬元，私隱公署6月舉行嘅亞太區私隱機構論壇預算只使5萬蚊，咁慳家，難怪吳專員話唔驚審計署查數，歡迎放馬過來。