張艾嘉自從93年為宣明會開始了非洲的探訪工作後，16年來她的足迹踏遍不少戰亂、貧困的國家，也曾攜子同行，因為藝人有一定的影響力，所以近年有不少團體邀請藝人參與探訪活動，張艾嘉希望他們可以繼續做下去，不要因一時衝動去一次便算。
訪問中張艾嘉展示不少探訪時所拍下的照片，照片裏的小孩沒有華麗的衣服，但他們面上總是掛着很開心的笑容，保持着小朋友那份純真的感覺，張艾嘉日前說：「係呀！我哋真係深深覺得嗰邊啲人，喺某一種情況下，有一啲幸福係我哋唔見嘅，呢啲係單純，對物質嘅慾望好少。」
以身作則教仔
張艾嘉續說：「今次我探訪返嚟後，真係覺得貧困唔係好醜陋嘅嘢，佢哋同貧困一齊相處，依然覺得好美麗，而呢份美麗嘅感動力好強，發生乜嘢事情都一齊面對，一齊分享，唔似城市人，雖然大家住得咁近，大家都好有錢，但係當發生問題嗰陣，都搵唔到人去傾訴同幫助，自己一個人要孭晒所以痛苦。」
張艾嘉過往亦曾經帶兒子參與探訪活動，她說：「我曾經同大仔去柬埔寨探訪，佢返嚟之後寫咗一封信畀我，佢話會記得同好appreciate（感激）我帶佢去呢個trip。我又同細仔去過內蒙，佢都話好記得呢件事，我覺得小朋友未必因為一次探訪改變人生，呢啲要長期咁做，好似播種一樣，等佢大個自己發芽，我相信到佢哋大個咗，自自然然都會去做。」
跟張艾嘉談到藝人身份，是否有助探訪？她笑說：「應該會有，所以有咁多團體搵啲藝人又或者知名人士出嚟，希望借助我哋有更多影響力，呢10幾年都多咗好多藝人做善事，做得好好，不過都希望佢哋可以繼續做落去，唔好衝動只係做一次，探訪返嚟之後要向社會大眾清楚表達見到嘅情況，而唔係話啲生活好苦、食咗乜嘢落肚，最緊要清楚知道自己嘅mission（使命）。」
探訪有新感受
今年年初張艾嘉重回首次踏足的地方—埃塞俄比亞，雖然每次的探訪總有新感受，不過這次舊地重遊的感覺與過往不同，張艾嘉說：「16年前我去埃塞俄比亞，啱啱係大饑荒後開始重建工作，好多地方係要坐細飛機先去到，今次已經有路可以坐車，雖然條路未修葺好，整個車程都好『扽』，但係見到重建後好多地方都比以前有改善。」
採訪：何慧斯