「近朱者赤，近墨者黑」呢句古語，幾時都可以警惕世人。今次全球恐慌嘅豬流感事件，我求大俠姑且將呢句金句，演變為近「豬」者赤（頭赤），近「墨」（墨西哥）者黑。當黑嘅梗係阿仙奴嘅墨西哥小將卡路士韋拿，事關佢有祖國朋友嚟英國探佢，領隊雲格收到風即時將佢隔離唔使操練，呢勻聽到墨西哥呢3個字都怕怕。
豬流感呢個新病例率先由墨西哥爆發，話唔定殺到埋身，大家應該要有危機感。雲格一知道上個禮拜卡路士韋拿有班墨西哥朋友嚟搵佢，就即時叫佢唔使跟操，留喺屋企唔好出街，以免如果真係賴咗嘢，傳染畀成班隊友就大件事。好彩，卡路士韋拿周二睇完醫生之後，證實冇中招，其後終於可以返訓練營操練。
唉，我求大俠睇港產片《生人勿近之問米》，或者西片《極度驚慌》好多次，估唔到現實版《生人勿近之問墨西哥啦》咁鬼恐怖，搞到全球恐慌生人勿近。我求大俠都講過近「墨」者黑，話口未完，就輪到巴塞隆拿嘅馬基斯當黑；呢位墨西哥守將喺周二歐聯4強首回合，自己後場帶帶吓個波都會無端端扭親膝頭哥，家陣仲證實要收「咧」㖭！
郭晶晶放棄出征美國
家個個都希望遠離墨西哥，好似中國跳水女王郭晶晶，原本要參加下月喺美國舉行嘅格蘭披治跳水賽，目前已經退出咗。京奧跳水金牌得主澳洲嘅米治咸，同樣上周喺墨西哥比賽完後被下令要返國。不過呢個時勢就有人唔怕死係都要去墨西哥，著名美國單車手岩士唐嚟緊29號至5月3號，就會去到墨西哥參加世界賽，咁祝你好運啦！
足球方面，唔知係咪都驚鬼咗墨西哥球員，周二自由盃利伯泰迪主場輸0:2畀墨西哥代表聖路易斯，後者仲打入埋16強；而另一支墨國勁旅瓜達拉哈拉，喺E組出線都樂觀，仲唔係對手驚你哋有病？