記者G來電，要搵「鳳姐」電話，咁耐唔見，搵舊上司做乜？記者G話正在寫緊篇特稿講「六四二十周年」，想搵到當年嘅現場記者講吓回憶喎。唉吔吔，果真不敢回憶，不能忘記，當年一班香港記者在天安門現場艱苦採訪，回來之後曾經出過一本書，叫做《人民不會忘記》，由六十四位記者執筆，鳳姐就係其中一位編輯，照計人證物證俱在，書未燒，邊個夠膽亂咁噏？佐丹奴當年推出市場之T恤，例如「您好，請您下來」，左丁山還有收藏。記者G係「六四後」先至出道嘅記者，搵番啲老兵講舊事，宜也。一啲老兵今天已貴為官府中人，一啲已經轉業，或者唔方便出鏡嘅，畢竟現場學生主角之中，只有王丹一位仍然經常出鏡講六四而已，逃出大陸，往哥倫比亞大學讀博士嗰位李祿，據余錦賢講，已經係私募基金中人，幫股神畢菲特扯線投資大陸公司啦，記得當年肥佬黎講過，千祈唔好逼人做烈士，今天更加唔好，舊人唔肯講嘅話，算嘞。
六四對香港有甚麼長久影響？諗嚟諗去諗唔到，最後卒之認為，六四對香港及台灣之最大、有lastingimpact嘅有形影響就係催生咗《壹週刊》，然後衍生《蘋果日報》，再生台灣《壹週刊》及台灣《蘋果日報》，沒有八九年的六四民運，好難想像T恤大王肥佬黎會轉型搞雜誌，建立「壹傳媒」，日後如果有學者寫二十世紀二十一世紀交替期間之中國新聞史，不能不提「壹傳媒」之崛起與壯大，追到源頭，就係六四。
二十年眨眼即過，今日大家最關心嘅話題，會係豬流感而不是六四，豬流感失驚無神，已在墨西哥殺死百餘人，傳播速度之快，實在驚人，搞到墨西哥城所有公眾場所，成為無人地段，某報大字標題曰：「墨西哥城，萬人空巷」，讀者看了，嚇到眼鏡跌滿地，乜「萬人空巷」可以有如此解釋嘅咩？呢張係老牌大報，歷史悠久，昔日以零錯字為傲嘅噃？馬會在天水圍，開辦投注中心，招聘千五名兼職，最低時薪係四十一元，竟然吸引咗過萬人冒着大雨到場排隊，先至可以講：「馬會招聘，天水圍萬人空巷」！不過咁，曾有人寫公關稿形容當事人「閱人無數，社會關係極佳」，一眾朋友看了，不禁大笑，反而撰稿人及當事人之年青夥計問：「你哋笑乜？」