豬流感疫情繼續擴散，但外國股市反應唔大，港股先天下之憂而憂，跌咗兩日，噚日已反彈，恒指升番400點，5月期指就升369點，低水167點。
大市在萬五大關爭持，暫時未脫險境，10日線（15192）回落中，壓力唔輕，今個月大市形成小型頭肩頂，前日的14458低位，跌破就要繼續尋底。
豬流感疫情發展，無人可估得到，情況可以好壞，但危中亦有機，噚日就有740多隻正股上升，隨機應變，每一日都有賺錢機會。
內房股板塊最出色，最勁係中渝置地（1224），搶上2.44元高收，大升16.2%；越秀投資（123）持續強勢，亦大升13.2%；其他如富力（2777）、合生創展（754）、遠洋地產（3377）和世茂房地產（813）等，都有10%以上進賬。內地房地產回暖，股價看好，每一次調整都係低吸機會。
汽車股亦有好表現，東風集團（489）更急升近11%，中央大力振興汽車行業，推出汽車下鄉同減免購買稅，即時見功，上月內地的新車產銷量，齊齊創出新高。
預測PE僅6.7倍
長城汽車（2333）去年業績倒退，但今年首季情況已大大好轉，公司對前景亦信心十足。08年（12月結），營業收入82.1億元人民幣（下同），升8.3%；股東應佔利潤5.13億元，減45.3%，每股盈利47分，減48.4%，末期息派15分。
集團去年共售出12萬輛車，其中新推出的轎車售出9754輛。今年首季，已售出3.8萬輛車，同比增長25%，而轎車售出1.2萬輛，已比去年全年為多。
去年由於原材料價格上漲，以及轎車未形成生產規模，致毛利率只有18.1%，下降5.6個百分點，今年經營情況已明顯好轉，轎車產銷肯定已可超過4萬輛的盈虧平衡點，可以提供盈利貢獻，公司已計劃在天津分3期興建年產10萬輛的轎車出口基地，擴大市場份額。
09年估計長汽盈利可達5.8億元，每股盈利53分，折60港仙，預測PE6.7倍，長汽最近由高位回落，可趁低吸，短線望賺兩成。
郭兆誠