年頭東亞銀行（023）舉行90周年酒會，富豪高官齊齊到賀，噚日輪到本地發鈔銀行之一嘅渣打，舉行150周年酒會，富豪高官名人一樣捧場，高官有行政長官煲呔曾蔭權同財政司司長曾俊華，而金管局總裁任志剛日頭出席完立法會雷曼小組研訊，傍晚又到渣打生日會，可謂風塵僕僕。
本地富豪當然唔少得，事關做生意嘅，同銀行打好關係至緊要，幾忙都要到。所以超人李嘉誠就算幾唔得閒，都匆匆嚟同渣打嘅集團CEO冼博德及銀行CEO洪丕正握手恭喜，但未等儀式開始佢就低調離開。身為渣打非執行董事嘅郭炳聯則後腳趕到，其他商界人士仲包括羅嘉瑞、趙世曾、曾蔭培同簡文樂等。
酒會上渣打仲展覽一批歷史久遠嘅紙幣、歷代迪士尼公仔錢箱及提款卡，最古老一張紙幣係1874年發行，5月開始仲會喺渣打總行同個別分行展覽㖭。