樓市小陽春，發展商推盤，不論平貴都賣得熱熱鬧鬧，身邊想買樓嘅朋友開始按捺不住問？連炒家都出籠，都應該係入市嘅時候喇啩！
有位太太喺敏妮Talk度留言話，想買個單位自住，舊年已經開始等緊入市機會，但自從金融海嘯後，佢估樓價仍然會繼續跌。點知近期樓市反彈，佢覺得自己錯過咗低撈嘅良機。之前睇到敏妮寫樓價可能會跌，呢位太太話，佢睇完之後覺得好高興，但就問敏妮有幾多成把握？
發展商何解爭相賣樓
敏妮唔係想賴皮，把握唔係話冇，但好難話有幾多成把握，唔通話你聽敏妮有七八成把握你就信，話你聽得兩三成你就撲入去買樓咩！不過自從發生豬流感事件，敏妮把握的確提高咗。
噚日敏妮收到喺潮流雜誌做嗰位老朋友嘅email，佢話有風水師傅同佢講，明年樓價會升兩三成，原因係通脹兼銀行利息低，資金都吸到去樓市，問敏妮是否認同。明天嘅嘢都尚且難料，何況明年！不過敏妮有一個諗法，近期長實（001）、新地（016）相繼推盤，唔理平貴，一樣賣得熱熱鬧鬧，不過，想深一層，如果你係睇好後市，使唔使咁趕推盤？
港女智慧見好識收
港女智慧，擺明大把人追嘅，梗係應該吊高嚟賣。家陣通宵賣樓、業主反價，乜嘢好消息都出晒，但發展商居然唔係吊高嚟賣，封盤餓吓班買家，再谷吓啲購買力，反而相繼推貨，似散貨趕搭尾班車，多過對後市睇好。
噚日聽聞大陸有過百宗疑似豬流感個案，五一黃金周就嚟到，如果大陸再出現疑似個案消息，到時又有大批大陸同胞湧港，你話樓價會點走？
溫敏妮
http://wanmanli.com/blogs/