前晚睇完紐卡素對樸茨茅夫場英超，我求大俠明白乜嘢叫一廂情願。以為舒利亞同時派奧雲、馬田斯同維度卡打3箭頭就可以贏波，點知呢3隻「喜鵲」原來唔識飛，最終0:0完場，搞到舒利亞火都嚟，狂插班前鋒屎波。
「我真係好失望」
紐記賽前喺英超8場不勝，但話晒有主場之利，同埋舒利亞排個4-3-3攻擊陣出嚟，加上對手樸茅冇乜護級壓力，故臨場主W仲由1.95倍瘋狂落到得1.75倍。之但係唔係前鋒多就一定入到波，都要睇吓班人有冇料，紐記全場有14次射門，竟然得4次中龍，結果0:0完場，攞唔到救命3分，仲跣到捧場客攤攤腰。
冇錯奧雲、馬田斯同維度卡個名係好響，弊在奧雲早熟早殘，仲患埋禁區恐懼症；馬田斯傷完跌晒watt；至於維度卡就年紀大機器壞。要靠佢3個入波，機會同俾叉燒包鯁死，都係近乎零。舒利亞賽後亦大發雷霆：「我好高興我哋製造到入波機會，但好唔高興入唔到波。我哋攞唔到3分，真係好失望。佢哋3個有好多機會，弊在一個都把握唔到，搞到我哋要付上沉重代價。」
舒利亞繼續插：「我淨係要求班球員踢場爭氣波，點知就踢成咁。我排3個前鋒出嚟，就係要佢哋合力進攻對手，每人有一次機會，加埋都有3次啦！我諗住其中一個會入波，點知一齊食白果！我哋班攻擊球員返到屋企要攝高枕頭諗吓，點解咁多個機會都把握唔到。」
硬仗連場兵凶戰危
紐記和波後34戰得31分，由尾2升上尾3，但比尾4嘅侯城同尾5嘅新特蘭，分別少3分同4分；而餘下4場硬仗連場，對手包括利物浦，同埋爭緊歐洲賽資格嘅維拉、富咸，所以佢哋嘅降班賠率，亦熱至得番1.25倍。雖然我求大俠好唔想見到紐記降班，但問題係佢哋班前鋒實在太廢，真係劫數難逃。