紅線女噚日喺何文田中文大學分部為佢炮製嘅動畫《刁蠻公主戇駙馬》開記招，80幾歲嘅女姐喺台上介紹嗰陣依然中氣十足，仲好鬼馬咁講笑話自己係伯爺婆，佢話自己一直都好想可以演出俾大家睇，但係因為自己年紀大喇真係冇辦法，所以早喺幾年前，佢就諗到用動畫嘅方法去延續佢幕前嘅演出，主持人叫女姐不如唱兩句曲畀大家聽，點知搞鬼嘅女姐就真係唱得兩句，連主持人叫佢唱多句佢都唔肯。
5月2日慈善首映
追求完美嘅女姐話呢輯動畫經過兩次嘅失敗先成功，但佢依然話唔係好滿意，而裏面嘅女主角把聲仲係由女姐配音，所以佢喺台上都笑自己話：「睇唔到我幾十歲嘅伯爺婆，但都可以聽到我把聲！」女姐向來出名聲音甜美，佢話係都係媽咪遺傳畀佢㗎，加上自己後天嘅不斷努力學習，先可以變成今日嘅女姐腔。此外，5月2日喺新光戲院重會舉行「紅線女粵劇動畫刁蠻公主戇駙馬慈善夜」，女姐話佢親自打電話搵張學友、劉德華同汪明荃等出席。