《變種》系列唔少人彈佢特技、故事唔及《蜘蛛俠》，不過「交叉人」話晒Fans多，拍戲出Game大把人受；正如今日搶閘上畫嘅《狼人外傳》，肯定係呢個禮拜最多人睇嘅大片，想更了解佢嘅背景，玩埋同步遊戲版就至佳，因為佢會披露連套戲都冇提嘅古仔，咁就唔怕同Friend冇話題啦！
文：陳福榮
拳拳見血打到飛起
為咗配合狼人兇殘無比嘅性格，伸晒利爪嘅拳腳交都冇乜可能唔見紅，因此佢嘅血腥程度係比過往任何一隻「交叉人」為勁。例如飛撲過去部直升機度，再將機師夾硬揪出嚟嗰幕，係會誇張到舉起對方俾機葉狂片，當然唔少得用利爪將敵人一分為二，唔怪得佢個年齡評級係成年人指定啦！
由於開發小組RavenSoftware曾炮製過《X-MenLegends》同《SoldierofFortune》等口碑上乘佳作，外間早就對呢隻狼人遊戲抱有期望。另外除咗兩大主流家用機外，《狼人外傳》亦會推出Wii、PS2、PSP同DS版本，不過質素就拍馬都追唔上。
食腦解謎唔少得
講到本作特色，唔係下下同敵人硬撼，有時要借開機關或搵秘密路嚟扭轉局面，似足《Bio》玩解謎。同埋打大佬又係要搵弱點，摷到先打得入肉，得鋪蠻力冇鬼用。
狼人戲中擁有自我復原能力！為跟原著，開發人員就幫佢啲衫褲做咗手腳；當俾人斬傷或中槍，衣服會出現破損同流血；經過一段時間肉身復原後，就算唔再流血啲衫依然會係爛咗，從視覺上睇，真係有強烈電影感。
逾半劇情重新創作
遊戲已將九成電影情節搬入Game內，但為增加可玩性，遊戲亦另行構思大量新製部份，保證新嘢會佔多過一半。撇除狼人喺十九世紀末誕生加拿大同臨尾參加X計劃，亦有好大成份着墨於佢年青從軍戰史，因此要面對好多世界大戰時代嘅軍佬。
隻Game最令人意外係有血拼幾十米高嘅Sentinel巨型機械人一幕，高矮差距勁誇張，電影版一定冇機會睇到？
Profile
機種：PS3、Xbox360
廠商：Activision
類型：ACT
人數：1人
