中共建政60年，官方香港電台配合和諧主旋律，下個月起推出連串電台、電視、互聯網製作同研討會，多角度探討內地60年來發展，噚日請咗多個1949年出世嘅名人，為呢啲節目揭開序幕，仲要各嘉賓送一份「賀壽」禮物。
呢啲錦上添花活動首要政治正確，所以港台請齊左、中、右人士，有民建聯陳鑑林、全國政協方黃吉雯、自由黨張宇人、公民黨鄭宇碩，出爐影后鮑姐同資深新聞工作者程翔都有份，算係點綴點綴。陳鑑林認為鄧小平92年南巡係60年風雲事件，程翔認為趙紫陽係風雲人物，佢話《聖經》最啱做壽禮。
鮑姐則認為四人幫倒台最大件事，佢父親鮑方係左翼長城電影、鳳凰影業演員、導演，喺左派文藝界甚有江湖地位，被譽為「資深愛國電影工作者」，鮑姐根正苗紅，「紅」得有理。