豬流感疫情漸見擴散，民眾亦已預料遲早殺到香港，港股短期可謂難有作為，昨日大市曾反彈近15100水平，似乎係好友今個浪最後撤退機會，其後掉頭急插，恒指再跌近300點。
疫情憂慮不過係藉口之一，星俠觀察所見，昨日唔少股份一掟即散，與之前遇沽壓即見幕後買盤力托之情況迥異，估計大戶喺呢種市況之下，「監粗」去頂住股價亦冇用，所以費事浪費彈藥。
候40元企穩才入市
平保（2318）公佈首季業績，純利19.9億元人民幣，急跌72%，雖然扭轉去年第三、四季連續兩季「見紅」局面，但市場唔滿意表現，加上撞正大市唔就，平保股價昨大跌9%，收報45.25元，暫守於50日線，但估計守唔住。
不過，平保昨日跌得太急，若大市回穩，唔排除先有反彈，但唔建議買入。有心買貨，宜等下試40元水平守穩才考慮。
方星俠