幾年前被沙士搞到雞毛鴨血嘅九龍灣淘大花園，一早已經復原番晒，就算家豬流感山雨欲來殺埋身，投資者同用家對呢個屋苑都冇有怕，係咁入貨。
好似當年最水深火熱嘅E座，聽香港置業營業經理陳偉宗講，一個禮拜內連續賣咗兩間，買家都係自用，而業主就覺得個價差唔多，想套現先。其中高層7室成交價172.8萬，業主賺咗25.8萬蚊；另一間高層8室，屬投資者舊年頭摸頂貨，家蝕咗40.8萬走人，成交價173萬。
買家自用冇有怕
美聯物業營業經理鄒殷岳話，因為家銀行利息實在低得可憐，而市區百幾萬可以上車嘅屋邨樓，數埋又實在唔係好多，所以淘大花園近呢幾個月成交好旺。
聽講今個月就有一名投資者連氣掃入5個連租約單位，銀碼大約800萬至900萬，其中一個係J座高層7室，成交價168萬，家收緊大約6800蚊租，回報有成4.9厘。