幾年前流行一時嘅「智庫熱」，近日有翻炒迹象，《經濟日報》老闆馮紹波出錢出力，成立「香港集思會」，聲稱核心價值係「集思廣益」，口號係「齊思考、創未來」，成員包括學者同退休高官，現時已經有34位顧問。
「香港集思會」定位唔係聘用專家做調研，好似「智經」、一國兩制研究中心嗰種，而係搜集各界意見，討論、評估後，再炒埋一碟向外發表，總之就係為香港好啦。馮老闆強調呢個係獨立、冇政治背景、非牟利研究機構，資金來源主要由熱心人士捐獻。
馮紹波係老國粹派，老董年代國粹派上位，近年成班人則較為低調，忽然企出嚟搞智庫，引來政壇議論紛紛，猜測可能又係抬轎、造勢平台。