墨西哥豬流感惹到好多地方都有事，呢隻可怕傳染病，有陰謀論懷疑係針對美國總統奧巴馬嘅生化襲擊，令美國如臨大敵，環境局局長邱騰華同財爺鬍鬚曾將會出訪美國，高官深入疫區，今次出差真係搵命博。
做足預防措施
雖然食衞局已經發出強烈勸喻，提醒市民如非必要切勿前往受人類豬流感影響地區，墨西哥更加生人勿近，不過高官訪問行程不能貿然改變，惟有頂硬上，邱騰華正在多倫多，之後轉去渥太華，離開加拿大後會飛美國，首站係華盛頓，拜會參議院能源及自然資源委員會主席JeffBingaman，隨即到波士頓同學者見面，進一步了解使用電動車情況。
鬍鬚曾今日出發去三藩市，去完美國去加拿大，會同兩地政、經界高層人士會面，了解金融海嘯最新情況，據講港府駐當地經貿辦已俾晒疫情資料相關官員，評估可如期訪問，抵達後只要做足衞生署嘅預防措施，好似勤洗手，必要時戴口罩等，應該唔會中招，毋須每日滙報健康狀況。