有「千億新抱」之稱嘅徐子淇三年抱兩，老爺四叔噚日出席浸大當代中國研究所開幕禮後，開金口透露子淇預產期在即就嚟生得，更首次證實再次抱孫女，表示呢胎「應該係女嘅機會大啲」，再次做爺爺，八方真係要恭喜四叔。
望有孫仔繼後香燈
四叔係股市明燈，年前恒指升到逾二萬點時，佢大膽預測會繼續升，全力唱好，好多散戶當正佢係股神紛紛入市追貨，後來個市逆轉，恒生指數跌咗落嚟，四叔自己都要坐艇，無奈自嘲係「冒牌股神」、「A貨股神」，家陣唔敢再貿然畀貼士。
雖然子淇生女好事成雙，不過四叔似乎仲未夠喉，支持特首煲呔呼籲市民最少生三個政策，被問到子淇係咪要再生多幾個時，佢笑晒口咁話：「係呀！係呀！係呀！」唔再睇好恒指瘋狂大升嘅四叔，想抱孫嘅恨生子數卻明顯未轉勢，亦冇咁易扭轉，八方聽佢口氣，相信會維持反覆向上格局，短期長升長有，中期望生多個，長期就生夠為止。
徐子淇願望係生BB生到30歲就收工，老公李家誠亦話生BB要隨緣適可而止，不過四叔卻一早表明，新抱最少要生到33歲，更唔止一次講到出口「恨」有個孫仔繼後香燈，幫李家傳宗接代，子淇呢胎追多個女，意味佢未有耐收得工，女人最痛係生仔，八方都戥佢肉赤。
豪門新抱生仔任務有時真係唔到自己或者老公話事，李嘉誠新抱入門後連續三胎都係生女，後來聽聞得高人指點，將個名由王富信改為王儷橋，06年終於追到個仔Michael，自此收工，可以安安樂樂做少奶，子淇如果想肚皮快啲休息，四叔恨生子數回落，可能都要同老公閂埋門諗吓辦法，繼續努力造人。
好彩辛苦係有回報嘅，子淇生完第一胎，獲老爺送贈千萬禮物獎勵，包括巨型鑽石頸鏈同巨型鑽戒，又豪擺兩日BB女出生80日宴，據講埋單要成千萬元，今次再為李家添丁，相信四叔都唔會輕手，四叔噚日自爆正諗緊送乜禮物畀新抱，如果子淇真係6月初生得，四叔仲有成個月時間慢慢諗，唔使急，最緊要生。
mailto:[email protected]