陳自強（Willie）做成龍經理人起碼有30年，年幾前先冇再合作，早排成龍喺海南博鰲亞洲論壇發表香港同台灣人太自由，中國人係要管嘅奴才論，事後曾志偉同譚詠麟（阿倫）都話好懷念以前有謀臣陳自強喺成龍身邊嘅日子。
謙指志偉畀面
唔再幫成龍打工嘅Willie，最近成立新公司自強創庫，又再喺娛樂圈大展拳腳。噚日佢喺銅鑼灣同星娛樂CEO何哲圖及日本富士電視台《GoldHouse》節目總監渡邊宏一齊開記者會介紹公司未來發展，但大家都掛住追住問成龍奴才論單新聞。講到志偉嘅意見，Willie好謙咁話只係志偉一班好朋友畀面先咁講，佢話成龍出嚟講嘢係有一班人幫佢度料，唔係得佢一個。
Willie同成龍經歷過唔少風雨，但家成龍同Willie關係好似好疏離，Willie話：「我都離開年幾，佢放我埋一邊都唔出奇，30年合作關係，唔係忘記就冇咗，之前喺《新宿事件》首映有見過面，我唔會日日打畀佢問佢起身未。」有網友發起送成龍去北韓受管，問Willie聽到有冇難過，佢唔肯評論。至於成龍嘅奴才論，佢話任何人都有自由去諗去講喎。