時間，真係可以改變一切。長毛做咗多年議員，好多人仲覺得佢係街頭戰士，認為佢有勇無謀只係識得抬棺材、嗌口號、衝鐵馬，成日趕長毛離開議事廳嘅立法會主席曾鈺成，噚日竟然為長毛平反。
讚有理念好勤力
青協安排佢同青少年對話，有人問佢長毛當選，係咪代表市民不滿政府，所以選個人入去搞破壞，曾鈺成話此言差矣，因為經佢多年觀察，較深入認識長毛後，發現佢唔係一味行動派，而係有理念、有理論基礎嘅人，講嘢成日引經據典，又熟讀《毛澤東選集》，唔係咁簡單。
曾鈺成又大讚長毛做議員好勤力，處理好多求助個案，雖然唔係單單投訴都可以解決，但積累下來，就獲得越來越多支持。
喺大學讀數學嘅曾鈺成，話自細冇諗過從政，反而想做「救火鬼」，即係消防員，可惜呢個理想不能達到，難免有啲遺憾；青協總幹事王䓪鳴唔怕崩口人忌崩口碗，笑指曾鈺成家都係「救火鬼」，只係唔使着防火衣深入火場，而係在立法會幫政府救火。