唔知係咪因為睇慣上市銀行咁複雜嘅數口、兼且金融海嘯咁大風浪都頂得住，所以銀行掌櫃特別容易獲上市公司青睞，繼早前寶哥哥旗下猛將、東亞銀行（023）前財務總監尹焰強，跳槽到上市公司瑞安房地產（272）後，居本地註冊上市公司市值排名榜首嘅恒生（011），行內「三哥」執行董事兼財務主管Patrick陳國威宣佈7月辭職。據聞佢俾另一重磅藍籌羅致，華華聽聞重金挖角嘅新老闆係新鴻基地產（016）。不過，要等正式公告至作準。
噚日恒生有關陳國威辭職嘅公佈，字裏行間已有暗示。通告話Patrick將於7月8日請辭，唔再喺下月股東大會競選連任董事，係方便佢喺「金融界以外」發展事業，仲祝願佢老哥事業蒸蒸日上。
可能接黃奕鑑棒
作風低調嘅Patrick，縱橫銀行界超過廿年，貢獻畀恒生嘅青春就有14個年頭。同時兼任恒生（中國）副董事長嘅陳國威，近年除咗打理銀行財務，仲專注協助該行勘探參股併購等策略發展項目，好似恒生參股內地興業銀行，Patrick就直接打骰，向柯大班滙報。
若加盟消息屬實，陳國威日後好可能係接黃奕鑑喺新地財務主管嘅棒，以Patrick喺財務及企管嘅專業水平，相信可為新地企管發展注入新動力。
李華華
mailto:[email protected]