新世紀疫症豬流感引發全球恐慌，疫情由源頭墨西哥進一步在美國擴散，歐洲及新西蘭等地也同時爆出疑似個案。好姨薛家燕、甄子丹及樂基兒等名人藝人的家人分別於美國留學和定居，對豬流感肆虐，眾人均為家人安全問題擔心不已，紛紛致電家人提醒他們注意衞生。至於身處美加的梁洛施昨表示會加強防備，而薛家燕的細女石耀珠正於加州留學，學校近墨西哥。 採訪：林妃
薛家燕 戥囡囡緊張
好姨薛家燕二子石耀庭及細女石耀珠目前分別在美國讀大學，對豬流感肆虐，好姨極度擔心：「囝囝喺Purdue（印第安納州）大學就讀，同墨西哥距離較遠，不過細女喺加州嘅U.C.Irvine大學讀緊，噚日同佢通過電話，佢話學校好緊張，因為佢哋比較近墨西哥，佢住宿舍幾個女同學一間房，有起病好易傳染。呢個病係人傳人嘅病，我都好擔心佢哋。」
梁洛施 會密切關注
梁洛施去年與英皇鬧翻要對簿公堂後行蹤成謎，先後被傳身在美國和加拿大，昨日記者透過其發言人盧覓雪聯絡到身在美加的梁洛施，對於豬流感肆虐，梁洛施透過盧覓雪表示：「多謝大家關心，我現在好好，身體冇乜事，我有注意豬流感新聞，自己會加強防備，保持強壯身體。」
樂基兒 憂加州父母
名模樂基兒的家人均居住在美國加州，她一聽到加州爆發豬流感時即表現得十分擔心，她接受電話訪問時說：「我父母同兩個妹都係住喺美國加州，我仲未contact佢哋，今日會即刻打電話畀佢哋，唔知有冇得預防，我會叫佢哋小心啲，冇必要唔好去人多嘅地方，同埋要戴口罩出街。」
張天愛 下周闖洛城
剛由北京返港的張天愛（Flora）下星期會起程到美國會合丈夫出席首映禮，她說：「我都有留意美國豬流感嘅疫情，唔係太過擔心，因為Russell（丈夫王盛德）嘅電影《DimSumFuneral》下個禮拜會喺洛杉磯上映，我會飛過去支持，都有叫佢小心啲，仲會帶定啲口罩過美國，相信家仲好安全，唔會取消行程。」
李連杰 速撤離巴西
李連杰最近去到墨西哥鄰近的巴西拍攝與史泰龍（SylvesterStallone)合演的動作新片《TheExpendables》，未知是否擔心南美爆發豬流感關係，李連杰逗留幾天完成戲份後，即在上周四離開里約熱內盧，昨已返抵新加坡。
甄子丹 囑雙親保重
甄子丹父母身在美國波士頓，他說：「我都擔心父母㗎，呢排我喺內地拍戲，但都密切上網留意最新報道，我近日都打多咗電話問候父母，佢哋好好，當地都唔算好緊張。我都提佢哋要注意衞生同健康，盡量少去公眾場所，好彩佢哋退咗休，比較鍾意留喺屋企，好少出街。」
吳宇森 大無畏返美
不少娛圈中人現居美國紐約，包括早年與商人胡兆明結婚後移居紐約的葉玉卿及台灣導演李安等等，而蘇玉華目前也身處紐約進修戲劇。至於吳宇森早前出席完香港電影金像獎頒獎禮後，已於上周偕妻返回洛杉磯休息，未知他會否因豬流感而返港暫避。
娛樂資料庫：美洲藝人與菌同行
豬流感肆虐，全球多個地區已爆出疑似個案，不少藝人及家人分別在這些地區居住，情況令人擔心。
地區：美國
藝人/家屬：葉玉卿、蘇玉華、李安、吳宇森、甄子丹父母、薛家燕兒子及細女
疫症情況：20宗確診
地區：加拿大
藝人/家屬：梁洛施 疫症情況：6宗確診
地區：巴西
藝人/家屬：李連杰 疫症情況：有疑似個案
資料來源：《蘋果》資料室