各位，09年英格蘭球員先生（PFAPlayeroftheYear）嘅得主係……傑斯叔！佢今次壓倒曼聯隊友里奧費迪南、尼曼查維迪、雲達沙同基斯坦奴朗拿度（C朗），以及利記隊長謝拉特，首次當選呢個由英格蘭球員選出嘅個人獎項，充份肯定呢位35歲老將嘅江湖地位。
我求大俠一路睇住傑斯大，睇住佢髮線後移，睇住佢由閃電俠變成指揮官。咁嘅傳奇球星點可能淨係兩獲PFA最佳年輕球員獎？好彩呢位2月先續約一年嘅球星，最終都一嘗多年心願，佢話：「我攞過好多獎，但呢個最大！因為由行家選出。」
《衞報》質疑傑斯表現
傑斯叔得獎感受更感人，「我13歲遇上領隊（費格遜），佢對我職業生涯影響至大。20年嚟，佢比任何人都了解我，我哋嘅關係無與倫比。我實在幸運，根本唔敢諗冇咗佢自己會點！」呢位球星最近上緊教練課程，預備將來繼承恩師教鞭。當然，好多人覺得傑斯得獎係爆大冷，英國《衞報》就咁寫：「佢嘅提名受到質疑，覺得大家係出於懷舊。今季聯賽正選12次上陣，另外12次後備上陣，取得一個入球。」可惜呀，職業球員唔同傳媒，數據唔係唯一考慮因素，出嚟行仲講聲望㗎！
講真，當今球壇利字當頭，上到場心情靚就show插花，心情唔好就踢人，傑斯喺球會賽事一面紅牌都未攞過，簡直係聖人啦！曼聯領隊費格遜之前同傑斯、史高斯續約就讚：「只要佢哋存在就係新星嘅模範，教曉隊友咩叫敬業！」呢啲咪叫以德行贏選票囉！
贏在人心贏在敬業
所以呢，其他候選人都好願意向799次為曼聯上陣嘅傑斯叔，報以真摯掌聲。今年最佳年輕球員獎就由維拉嘅艾舒利楊格獲得，最佳11人除上述提到7人外，仲有格連莊臣、艾拉、安歷卡同費蘭度托利斯。至於英格蘭足球先生選舉會喺5月13日揭曉，睇吓傑斯可唔可以梅開二度先。
近5屆球員先生得主
08/09年得主：傑斯 當季聯賽紀錄：24入1球*
07/08年得主：C朗 當季聯賽紀錄：34場入31球
06/07年得主：C朗 當季聯賽紀錄：34場入17球
05/06年得主：謝拉特 當季聯賽紀錄：32場入10球
04/05年得主：泰利 當季聯賽紀錄：36場入3球
資料來源： http://www.soccerbase.com
註：*者為截至27/04