胡諾言和陳琪低調拍拖7年，二人昨日拉埋天窗，在尖沙嘴舉行婚禮，不少圈中好友都往到賀，新娘前日還發燒，幸好昨日已恢復精神。胡仔恨做爸爸恨到出口，新娘子笑他要畀心機，落力造人，胡仔表示要向已有3名子女的吳家樂取經。
現年31歲的胡諾言昨日迎娶34歲的陳琪，結束7年愛情長跑，一對新人昨晚在尖沙嘴半島酒店筵開10席招呼親友，從二人日前拍攝的婚紗照中可見甜蜜滿瀉。新郎邀請了曹永廉和吳家樂等做戥穿石，而伴娘則由新娘胞妹擔任。胡仔和陳琪人緣甚佳，洪天明、陸詩韻、楊思琦、陳敏之和梁榮忠等都有出席飲宴。
10對金鈪戴到痛
胡仔和陳琪於昨晚7時多換上禮服和婚紗在酒店接受記者訪問，除了切結婚蛋糕外，又應記者要求親嘴，十分溫馨。問到新娘有多少嫁妝，她說：「我有10幾對龍鳳鈪，雖然戴時到手好痛，但越痛越好。」
胡仔表示一向喜歡小孩，問他婚後可會努力造人？陳琪即對胡仔笑說：「咁你畀心機。」新郎坦言十分羨慕吳家樂，稍後會向他取生仔經。一對新人會把蜜月延至明年初，胡仔說：「我哋拍拖7年，年年都有一齊旅行，所以蜜月都唔一定要即刻去，出年年初約埋朋友一齊去拉斯維加斯。」
斟茶儀式感辛苦
未知陳琪可是婚前太操勞，她在佳期前忽然發燒，令胡仔十分擔心，他說：「我仲話佢好病唔病。」幸好陳琪昨日狀態仍很好，但完成斟茶和不少儀式後，她不諱言說：「比想像中辛苦。」嘉賓之一的陸詩韻盛裝前來恭賀一對新人，她說：「我都唔知佢哋拍拖，收得好密，胡仔係好仔，佢結婚令我幻想破滅。」
採訪：楊潔雯
攝影：黃偉雄
