做過自憐自嘲的《男人之虎》、脫腋毛穿泳衣的《萬千師奶賀台慶》、咪不離身的《萬世歌王》，諷刺政治、挖苦電視文化、揶揄樂壇黑暗……以為玩無可玩？詹瑞文與林奕華看罷《星期日檔案》，深感港男縮骨港女潑辣，開劇《港女發狂之港男發瘟》，詹瑞文不介意扮女人傳福音，林奕華更揚言想做香港話劇團團長，打救一眾港男港女。
記者：蒙為亮
攝影：林栢鈞
林奕華
曾在麗的及TVB擔任編劇，後組成前衞劇團「進念．二十面體」，1994年憑《紅玫瑰白玫瑰》獲台灣金馬獎最佳改編劇本獎。1995年獲香港藝術家年獎，2005年獲頒授「民政事務局局長嘉許獎」，現為香港大學通識教育、香港浸會大學人文素質教育課程、香港演藝學院人文學科擔任講師。
詹瑞文
舞台劇演員及電影創作人，1999年獲香港藝術發展局頒發第一屆戲劇發展獎，分別在第七屆及第九屆香港舞台劇獎，奪最佳男配角獎（悲/正劇）及最佳男主角獎（喜/鬧劇）等，作品《男人之虎》演出128場，吸引逾90,000觀眾，創下香港劇場紀錄。
Repeat嗌交半小時
林奕華=林
詹瑞文=詹
記者=記
用上「福音」二字，一點不為過，不是危言聳聽，有看過「機場阿嬸」的短片嗎？這種無理取鬧的瘋狂會影響下一代。林奕華訪問開始時拋下一句：「如果港男港女問題繼續蔓延，你信唔信香港會淪陷？」我信，想多想，我打多個寒顫。
林：連《星期日檔案》都專登做個特輯，可見港男港女呢個問題幾嚴重，問題唔係一朝一夕，你父母都曾經係港男港女，不過以前佢哋無錢無選擇，只會一心想下一代好。簡單例子，家女仔第一次帶男朋友返屋企食飯，老竇老母必問：「做邊行，住邊？」做邊行重要咩？住木屋唔可以真心相愛？根本係代代相傳嘅價值觀問題，怪不得誰。
詹：絕對係，我都關心個男仔夠唔夠愛我個女，呢個世代大家都互相計算，點解話港男縮骨，港女大花筒？就係因為大家計數計到過晒火位，當咗另一半係Gucci、Prada、Rolex，要Show畀人睇自己另一半有幾勁，真愛根本唔存在，更遑論會尊重身邊人。
林：係呀，我成日喺街見到情侶嗌交都講呢句說話，女仔講完男仔又講，男仔講完女仔又講番轉頭：「你根本無理我感受。」「我無理你感受，你又有理過我感受咩？」同一句對白沒完沒了係咁Repeat。哈哈，我諗住今次個Show，有半個鐘都係Repeat呢一句，哈哈。
詹：正喎，咁對白都可以記少啲……
林：哈哈……
詹：今次最想藉住《港女發狂之港男發瘟》改變港人價值觀，笑位梗有啦，但笑完都想大家睇完個Show帶到啲嘢走，香港風氣越變越壞，救得一個得一個啦。大家只用錢衡量一個人嘅價值，內在真善美無人理，一見到人就即時諗：呢個人值幾多錢？識佢有乜着數？會幫到我乜？我唔係誇張，呢個係事實，既悲凉又殘酷，一諗到呢個位，好驚。
林：港男港女關係太建基於物質，一段感情可以好快玩完，因為男男女女都係無間道，無人付出真心，一心諗住良禽擇木而棲。再咁落去，人同人會越來越疏離，再咁落去下一代點算？成個香港，分分鐘會因為呢個病態問題淪陷。
以為他是真女人
訪問途中，詹瑞文收到一個電話，令帶病的他精神一振，好消息來自票房，一日沽清所有門票，立刻要度期加場；林奕華也不輸蝕，早前與張艾嘉和鄭元暢合演的《華麗上班族之生活與生存》舞台劇，零宣傳依然全場爆滿。反觀其他舞台劇，在金融海嘯衝擊下只得一半入座率，可悲可憐可嘆。
林：唔好話賺大錢，叫做為到皮，夠繼續做舞台演出咁啦，多謝觀眾支持囉，你知啦，金融海嘯大家都會手緊啲，要觀眾買飛入場有一定難度，希望多啲宣傳吸引人睇Show啦。
記：喺地鐵站同巴士站貼多幾張海報就掂？
詹：我諗不如咁講啦，香港觀眾唔會因為張Poster搞笑誇張啲就買飛入場，觀眾要求每個Show都有新Idea，散咗場要有嘢袋得走，所以我一路做一路變，食老本唔掂㗎，同林奕華合作至少唔會故步自封，兩個人度橋Angle多好多。今次係我哋第三次合作，上次玩電視文化，今次用港男港女做主題，我比較注重表演，講Brainstorm全部係林生功勞，無刻意分工，但我非常鍾意呢種合作關係，玩得高興，我諗住下半年拍電影，拍埋你一齊做電影，好唔好？
林：聽住先啦……如果要我分析點解阿詹咁賣得，原因只得一個，佢嘅演出跨越年齡同角色限制，所以觀眾層面好廣。學生一排一排咁買飛，師奶會同老公孖住睇，情侶又會睇。以前睇得舞台劇嘅，多數係斯文女仔或者文藝青年，家波牛都照睇，仲會睇到企起身大嗌兼吹口哨，興奮到好似曼聯入波咁款，的確神奇。
詹：我都聽過觀眾話：「入場係為睇詹瑞文扮女人。」我立刻講：「扮女人個個都識啦，你有權唔睇喎。」佢又咁話：「你扮女人，扮到我以為你係真女人吖嘛。」我都唔知好嬲定好笑。
心願當最高話事人
近十年香港藝術界不斷被批評為文化沙漠，劇壇更是劣評如潮，不過不知是否時勢造英雄，當藝發局及康文署依然停留在「偶有佳作」的境地時，一班獨立舞台劇工作者依然繼續堅守劇壇，詹瑞文和林奕華就是當中佼佼者。有人批評他們的演出過份商業，他們卻不諱言：「有啲商業成份，總好過完全僵化。」
詹：藝術同商業不可分割，玩藝術都要識變通，絕對唔可以一本通書睇到老，就算我再做《男人之虎》，都要加好多新內容同Idea，觀眾唔悶自己都做到悶啦。做呢行咁耐，我從來都係一句：「與眾同樂！」大家玩得開心，我唔介意爆肚搞爛Gag，甚至拉埋觀眾上台一齊玩，觀眾睇得High先會有氣氛，有乜理由每年都重複同一套經典先？點解唔加多啲新元素，令成件事Fusion啲呢？老實有得舊酒新瓶我已經好滿足，可惜家好多劇，都仲係舊酒舊瓶囉。
林：我有兩個心願，不過我諗有生之年都未必達成到，一，做香港話劇團團長；二，做APA（演藝學院）戲劇學院院長，我知無人會畀機會我做，唔係我做唔掂，而係我一上場，一定會問好多佢哋做咗十幾年都無諗過嘅問題，例如點解年年藝術節都搵啲傳統外國經典擔大旗？點解連一套劇場味重啲嘅作品都無？我夠膽講，香港劇壇比其他亞洲國家落後十年，人哋不斷前進，我哋就卻步不前。一日KingSir仲係香港話劇團團長，呢一切都唔會改變，佢嘅劇目太公式化，只會俾人睇到過去同現在，但劇壇要嘅係將來，其實香港新一代演員質地唔差，好多演員都肯學肯做，點解唔畀多啲機會佢哋試唔同嘢呢？
記：你哋鍾意教書多啲，定做編劇多啲呢？
林：我就兩樣都鍾意，作育英才培訓下一代，先可以令劇壇續命，當然我都唔會停落嚟，因為上得舞台演出，已經係最好教材，好似今次做《港女發狂之港男發瘟》，都係想教化眾生，叫佢哋唔好再沉淪。
詹：我都係鍾意演出多啲，雖然人人都阿Sir前阿Sir後咁稱呼我，但我唔適合長時間教書㗎，況且我教戲都係以Demonstration為主，無錯理論係重要，不過實踐嗰陣先出現困難咪仲弊？與其單睇理論叫苦連天，我會選擇繼續演出，做得好咪掂囉。
後記：林奕華與詹瑞文為現今舞台劇的不思進取，氣結得痛心疾首，沒錯劇壇要變革，更不能來來去去只得一個詹瑞文，但我盼望的是百花齊放，要改，換了帶頭的最高話事人就成了嗎？我想總有點用處吧，不過要做到一個由上而下的改革，非一朝一夕的事，幸好劇壇還有一些年輕新力量如梁祖堯、彭秀惠、火火等，他們依然有心有力，又是這一句──江山代有才人出，你看消極，我卻覺得積極無比呢。
《港女發狂之港男發瘟》
日期：6月19日至21日、26及27日7:30pm
地點：香港文化中心
票價：$420、$260、$290、$240、$170
查詢：25110139
