「十個的士佬，九個職業病，八個八折黨，七個嫖賭吹，六個大肚腩，五個無運行，四個樣衰衰，三個戇居居，兩個唔生性，一個發達相。」以上呢堆字，係電車Peter喺網上睇番嚟，再攞嚟寸佢靠的士搵食個老竇肥彩嘅。肥彩係同我哋HighTea時講番出嚟，當下即俾成班行家問候，幾乎要投票罷免佢麻雀會長嘅身份。難得有米車主邦邦都認同，佢話揸搵食車日日十粒鐘，好難無職業病，最慘係市道唔好，八折黨橫行，踩成晚最叻只搵到四、五百蚊，精神壓力好大。雖然大家都唔認，男人天生鍾意嫖賭吹，上年紀麻甩佬九成有大肚腩，不過着實全部都好中喎，當然唔止的士界係咁啦。十句入面，只有一句遭到集體否認，就係「十個入面有一個發達相」喇。我哋圍內三十幾人，只得三個係車主，一樣要自己揸番一更頂車租，周末無人開工仲要揸埋特更㖭。發達？個車牌近十年都圍住三百萬多啲，唔變負資產已偷笑。
文：黃師傅