呢期最hit人物，被罷免嘅港大學生會會長陳一諤應榜上有名，其實喺陳一諤之前，港大已經喺05年出過一位「愛國」學生會會長，就係基本法委員會委員劉迺強兒子劉方。畢業後去理大做政策研究嘅劉方最近蒲頭，夥拍民建聯蔡菜子組成保釣大聯盟，準備下月3號搞遊行兼去美、日領事館示威，要求還我釣魚台，至於登島激進行動，留畀保釣行動委員會負責。
蔡菜子強調唔係忽然保釣，佢幾十年前已熱血保釣，家重出江湖，因為《聯合國海洋法公約》即將到期，下月13號會重新審議包括釣魚台在內嘅海洋主權誰屬，身為中國人梗係要做啲嘢。劉方聲言保釣同老竇無關，稍後會號召友好參加保釣遊行。