識玩音樂、玩樂器，又搵齊三五知己，閒時夾吓Band，的確一樂也。最近JCShop新返兩款潮Tee就可讓各位享受Jam歌嘅樂趣，分別將電子鼓同喇叭着上身，前者可以打心口啲鼓，就會有嘭嘭聲音樂，而另一款喇叭Tee就更直接，心口放送音樂，變成人形喇叭！
記者：許福合
攝影：黃子偉
Model：Sofie、Norain@PureModel
7個鼓位
這兩件Tee都係美國Thinkgeek出品，黑色配上電子鼓同圓形喇叭，外表睇可能唔算突出，但着上身就知內有乾坤。先講件打鼓Tee，心口貼有個電子鼓，唔好以為裝飾咁簡單，着住就等於鼓神上身，只要拍打心口電子鼓，就會聽到「嘭嘭」嘅鼓聲，經過試驗，發現一共有7個「鼓位」在不同位置，會發出不同鼓聲，玩落逼真度相當高。雖然要好似「大猩猩」咁狂打心口，但可以自備私家鼓隨時Jam歌，對Band友認真係偉大發明！唔知將來會唔會出埋結他、電子琴呢？
手提捽碟
捽碟機都可以當鎖匙扣一樣帶在身邊！講嘅係這款DJSpeaker，大小唔超過一個手掌位，設有一個AudioIn插口，用跟機有埋嘅Line-in線就可駁iPod等MP3機，玩法好簡單，一共設有3種捽碟效果，SE1、SE2及SE3。SE1會係加音效，而SE2及SE3就係變速，推一下黑膠盤就可享用，機身同時內置有喇叭，自私啲亦可插番個耳機自己聽亦可。
人肉喇叭
猛咁打心口未必啱女仔玩，可以睇吓另一款黑Tee同樣搞鬼，心口有個喇叭，着上身直頭變成人肉兼移動型喇叭，與鼓Tee不同，喇叭Tee會結合一部MP3播放機，跟Tee會有張256MBSD卡，內有10首歌及10種音效，唔喜歡的話可以自己入歌仔，最大可用張16GBSD卡。記得歌名唔可以用中文，要改為01到20，若想05重複播放，加個L成為05L就會loop住播。可惜係人嘅心口只得一個，只放得下一個喇叭，想聽聲音兩邊走就無計啦。
查詢：JCShop（31022783）