二十世紀五、六十年代足球名將林尚義上星期逝世，因為佢一人獨居，昏迷在家，實際過身日期不詳。林尚義踢波時綽號重炮手，退休後講波別號「阿叔」，因長期在電視曝光，特別出名，與佢同期踢波嘅高保強、陳輝洪，反而冇咁多人記得。左丁山手頭上有一張老讀者送來嘅民國四十六年（一九五七年）十月二十日星期日嘅《香港時報》體育版影印版，當日有四場甲組聯賽上演，星島對傑志，光華對南華，中華對東方（花墟場），以及空軍對陸軍。同版仲有報導同年十月十九日星期六球賽，巴士大勝東華九比零，香港會與警察賽和四比四。
當年東方十一人隊伍之中排WM陣式，林尚義踢左中場，高保強踢中堅。當時林尚義係二十三歲，正值足球盛年，次年一九五八佢就有份獲選入「中華民國」隊參加東京亞運足球賽，決賽贏南韓，攞到金牌，威盡一時，而成隊人都係香港甲組球員，可說是香港足球黃金時代。
嶺南大學歷史系劉智鵬教授不久前搵左丁山飲茶，講起足球，原來佢好有興趣搜集資料，寫香港足球史，計劃推出一個「一人一球隊」嘅編寫計劃，佢自己就對東方十分有興趣，自己「霸」咗先，在座嘅香港文物史專家丁新豹博士立即舉手話自己係南華躉，佢要寫「南華」，劉教授叫左丁山揀一隊。如果要揀嘅話，自己勉強可以揀「光華」嘅，因為細路哥嗰陣，知道父親曾經做過「光華體育會秘書」，會員以中華電力公司嘅文職人員為主。不過左丁山素來現實過人，講就容易啫，真係做起嚟要有不少時間搜集資料，要搵人贊助研究經費至得；講到錢，劉教授就嘆一口氣，因為呢類香港本土非物質實體文化嘅研究，實在從來無人重視，如果佢在林尚義生前做一個詳盡訪問，等阿叔口述歷史，研究資料就會充足好多，但上一代人物走一個，就無一個，個人回憶消亡得好快。香港不知有無有心人有意於此，有興趣贊助嘅話，可以搵劉教授傾吓。
隔咗幾日，碰到議員L，佢對足球研究有興趣，佢做過愉園班主，與佢傾起，佢話最好研究愉園歷史，呢隊有足球、統戰背景，唔止足球隊咁簡單！