世事無常，有時真係唔到你唔信邪，行會成員發叔大年初二去車公廟求得下籤，批示香港「家宅不吉」，車公言猶在耳，墨西哥、美國就爆發豬流感，高官警告遲早傳到香港，豬瘟來勢洶洶，搞到人心惶惶，聞豬色變。
發叔早就話車公好靈，至於其他玄學家有冇咁準，卜中牛年瘟疫大流行呢？八方翻閱多位師傅牛年運程書，發現大家今年可能睇漏咗，楊天命則以一支「遊魂卦」，大包圍式預測香港今年容易受涉及肺部、氣管同頭部疾病打擊，包括埋各種傳染病㖭，佢噚日同八方講，睇完豬流感新聞後即時做嘢，起咗一支「水山蹇卦」。
煲呔下令防疫驚7.1
據楊師傅稱，呢支卦預示香港喺豬流感下有小事故，但冇大問題，市民只要留守香港，唔好外遊，應該可保平安大步檻過，八方聽完佢講，個心先安樂啲，總之淡定有錢剩，不過特首煲呔就唔敢掉以輕心，佢噚日返到香港，第一時間喺機場宣佈會把好關防範豬流感，據知佢日前身在合肥訪問時，已同食物及衞生局局長周一嶽通電話，遙控指揮抗疫。
煲呔今次咁緊張，係因為唔想步老董後塵，03年沙士襲港時，佢遭老董架空，淪為「掃街大隊長」，輪到佢揸莊，當然要做齣好戲，唔想衰畀人睇。特首親自落柯打，衞生署不敢怠慢，隨即提升戒備級別，官員更透露防疫目標係希望阻截豬瘟至到8月先傳入，點解未來三個月咁關鍵呢？官方解釋係屆時已放暑假，天氣較熱已過流感高峯期，疫症冇咁易大規模擴散，否則霎時間殺到埋身，後果不堪設想。
話雖如此，煲呔下令嚴防疫症，背後應該有個不便宣之於口原因。如果大家記性好，可能記得上次車公畀支下籤香港，正係03年，當年沙士襲港，50萬人上街，呢段六年前嘅歷史，恐怕煲呔也不想回憶，未敢忘記，正所謂防民之口，甚於防川，六四將至，7.1還會遠嗎？防民上街，甚於防疫，假如呢次防疫工作稍有差池，引爆民怨，相信會催谷唔少不滿政府市民上街，萬一又有幾十萬人遊行，煲呔怎麼辦？
mailto:[email protected]