人哋話玄學治港，八方一向覺得呢個講法有啲誇張。但噚日聽到，話連誠哥旗下嘅中環長江集團中心都搞大迷信，就真係冇說話好講。
《南華早報》噚日報道，租咗長江中心57樓辦公嘅荷蘭駐港領事館，計劃喺大樓內舉行荷蘭木屐展，順便為內地貧窮兒童籌款，點知長江中心嘅管業處sayno。據領事館一名職員透露，長江中心方面畀佢哋嘅理由係：屐即係鞋，「嚡嚡」聲唔吉利，不利大廈風水。
心理作用唔影響風水
對荷蘭人嚟講，木屐係佢哋嘅傳統民間工藝，當地嘅小朋友每逢聖誕節都會用木屐收集聖誕禮物，係令人聯想到喜慶嘅嘢，因此話木屐唔老利，啲荷蘭人都晒頭。長江中心管業處回應《南早》時承認拒借場地，但淨係解釋因為個展覽唔適合喺長江中心搞，但就冇進一步交代係咪同風水有關。咁都得？好彩英國人打骰嘅太古集團冇嫌棄，個展覽下個月會喺太古旗下嘅金鐘太古商場第三期舉行。
新正頭唔好買鞋呢個習俗好多人都知，但擺啲木屐出嚟會影響風水就恕八方孤陋寡聞，為此惟有請教玄學家麥玲玲。麥師傅話，個展覽只會舉行好短時間，唔會影響風水，除非擺好大件嘅銅或石製雕塑品，仲要擺成幾個月，先會影響風水。佢相信，今次應該係心理作用多過實際風水影響，尤其係潮州人、台山人、客家人、福建人，零舍多禁忌。
眾所周知身為潮州人嘅長實主席李嘉誠向來篤信風水，更何況長江中心係誠哥嘅大本營，可能管業處啲職員揣摩上意，費事佢老人家返到嚟見到啲屐唔老利，就自把自為。不過，同樣係香港大地產商嘅新地、恒地、華懋同南豐就似乎唔信邪，因為呢四個大地產商旗下將軍澳中心舊年11月先搞咗個「荷蘭聖誕木屐美術館」展覽，展出過百對荷蘭木屐，仲為期個半月。
八方唔識風水，但就最叻駁古，你話鞋令人聯想到「嚡嚡」聲，我就話木屐「屐屐」聲，寓意開心到笑「騎騎」就真。
mailto:[email protected]