金融海嘯對市場的冲擊，令不少上市公司變得謹慎，唔敢將公司手頭現金亂咁花，例如減少派息，或索性暫時唔派息，保留實力以應付市場變化。
剛公佈業績的大成糖業（3889），08年全年純利下跌20%至1.54億元，每股盈利0.148元，不派息。集團解釋，唔派息主要係要保留手頭現金，期內手頭現金由07年底9.06億元降至去年底4.56億元，加上金融市場仍然不穩，所以要更謹慎地保持現金流水平，今年唔會投入資金起新廠房。
入市只宜低吸
大成糖業強調只要市場狀況回穩，就會考慮恢復派息，但派息比率最多30%。呢個安排其實都算合理，事關環境陰霾未除，作風太勇好易中伏。
大成糖業派成績表前炒過一陣，但未能突破1元，高位0.97元。由於業績唔算搶鏡，估計短期已升完，後市可能要回試0.67元範圍，入市只宜低吸。
方星俠