上海將要成為國際金融中心，咁香港點算？近期有好多朋友都同敏妮講，趁自己仲有市場價值，要返大陸搵吓機會，為自己開拓大陸市場。之前有位賓架朋友亦同敏妮講，家陣啲年輕人喺溫室長大，佢哋應該擴闊自己眼光，唔好計較報酬，返大陸闖一闖。
香港市場規模細
敏妮認識唔少朋友，經常喺中港兩邊走，契大佬Kenny係其中一個，前幾日同佢傾開返大陸做嘢。Kenny話，無可否認，返大陸做嘢的確係一條出路，就以佢做電腦system生意為例，喺香港，市場規模細，有番咁上下規模嘅公司要搵電腦解決方案，可能只會揀跨國公司，至於中小型企業，肯使錢喺電腦解決方案嘅budget就相當有限。相反喺大陸，淨係一個華南市場都有排做，一間細規模公司，同佢傾一單生意都講緊過千萬，大陸生意當然比香港好做。
不過Kenny唔認同年輕人咁快就諗住返大陸闖。敏妮唔係好明，既然大陸咁好世界，年輕人勝在輸得起，冇包袱，點解唔趁後生返大陸闖一番天地？
發揮人冇我有優勢
Kenny話，喺香港做生意，個客最注重嘅係你做唔做到嘢，交情仲係其次，做唔到嘢，再好朋友都冇下次交易。不過喺大陸做生意，好多人都知，七分交情，三分實力，「敏妮，我哋出嚟做咗咁耐嘢，知道做乜嘢都有底線，但你試諗吓，一個後生仔，老套啲講就係一張白紙，冇任何經驗，就咁畀佢返大陸，盞學壞手勢，學咗錯嘅一套分分鐘害咗佢。」
敏妮當然明白Kenny想講乜，香港得以確立國際金融中心地位，靠嘅除咗係逆境自強，就係明白乜嘢係法治精神。敏妮都相信，日後嘅出路係北望神州，但更加知道人才大陸多多都有，要搶一席位就要發揮人冇我有嘅優勢，諗住返大陸闖，都係首先裝備好自己先。
溫敏妮
http://wanmanli.com/blogs/