華華聽聞，大英帝國財政部附屬部門──皇家蘇格蘭銀行（RBS）嘅駐特區窩輪部，最近推出新服務。
呢個服務係當投資者買咗牛熊證之後，一旦正股或指數差唔多到回收價時，銀行就向投資者發出個電話短訊，提吓投資者買咗嗰隻嘢就死得，直接啲講，即係死亡SMS。
提示價報憂不報喜
雖然話就話自行設定相關資產提示價，但只係限於差唔多被回收（離回收價3至5%），或到咗回收價時。
華華問點解唔可以真正自行設定提示價，例如離開回收價好多，當係到價獲利通知。有關人士話由於實在會有太多價位，如果任人定提示價，部電腦會頂唔順。華華相信呢個服務一定有人用，不過陰謀論睇，就係輪商只係想你止蝕唔止賺！
最後，呢個提示價服務，係最少延遲15分鐘報價，到你收到短訊時可能已postfactum，隻牛或隻熊已經啪咗！