英國上周通過新嘅稅務條例，年薪超過16.6萬歐元（下同；約170萬港元）嘅打工仔2010年起要繳納50%薪俸稅；加埋英鎊貶值，班英超外援打工皇帝仲唔走夾唔抖？阿仙奴領隊雲格都話：「外援壟斷時代即將過去，英超高質足球也將消失！」
可開公司逃稅
嘩！雲格講到世界末日咁，「現在台」老細「小街」咪嚇到瞓街？各位英超迷定啲嚟，聽我求大俠慢慢分析。以往班外援將收入39%嘅收入上繳英國政府，今次變相加到50%；1英鎊以前兌1.45歐元，家跌到1.1；聽落好似好甘，其實係你有張良計，我有過牆梯。
首先比較4大聯賽稅率（年薪連保險費逾200萬計），西甲45%，德甲同意甲就44%，即使英國下年季度抽稅增至50%，你估以英超球會嘅財力應付唔到咩？而且，英超外援喺英國以外嘅收入毋須納稅，因此C朗等蠱惑仔就齊齊開公司逃稅。所以呢，雲格為人未免太老實啦！
雲格仲話：「呢班外援將湧去西甲，一來水準高，二來可以諗計將稅率降至25%。」不過，巴塞隆拿大學研究顯示，西甲08年度總欠債高達35億，4大強隊仲慘，皇馬為5.6億、馬體會5.1億、華倫西亞5億、巴塞隆拿亦有4.4億。西甲尚且褲穿窿，意甲、德甲更冇資格爭，雲格過慮啦！
意西財困難挖角
講真吖！聯賽有冇吸引力，薪酬固然緊要，不過配套亦不可忽略。英超電視轉播出色，宣傳、形象俱佳，實力強到壟斷歐聯咁滯。所以即使收入比之前少啲啲，相信球星們都願意去英超嘅！目前，唔少英超「大富翁」都接近30歲，好似波歷克、杜奧巴、加拿斯等人，佢哋好難喺其他聯賽攞到同等高薪，分分鐘用槍指住佢哋都唔肯走。當然，好似C朗、法比加斯、F托呢類後生仔就難講啲，不過以英超Big4嘅財力，我求大俠唔信國外球隊可輕易挖角囉！
或者，對於其他聯賽嘅頂級球星嚟講，英超喺新稅制下吸引力大減，好似最近伊度奧就話鍾意巴塞水準高，伊巴謙莫域亦話首選係西甲。不過，呢個世界財力等如吸引力，稅率高咪送間杜拜別墅囉，最近曼聯都斟緊卡卡啦！係咪？