最近唔見咗飛哥蹤影，以為佢又同另一半去咗遊埠，但原來飛哥早排入咗醫院做手術，據聞已經康復，可以喺麻雀枱上打番幾圈。早前都有打電話問候過飛哥嘅梁劉柔芬叫大家唔使擔心飛哥病情，事關飛哥只係腰部生脂肪瘤，入院做咗個小手術，家陣鬼打都冇咁精神。
飛哥同梁太係多年老友，梁太老公梁孔德舊年選足總主席，據聞就得到飛哥大力支持同鼓勵。足總6月改選，早排嘅假波疑雲可能令梁孔德競選連任有暗湧，界內盛傳有人會挑戰梁孔德，但梁生就話未聽過有人撼佢，未驚過咁款。梁生噚日仲話阿叔林尚義踢波其實唔係好叻，最叻係講波，因住俾阿叔嘅粉絲投訴噃。