本版編輯「肥彭」對捉波膽好有心得，成日命中波膽後，請全組同事食「馬仔」；今次問一問佢意見，繼續追日乙「新丁」櫪木SC冇波入，主場對甲府風林吞兩蛋。
櫪木SC今季加入日乙，實力唔夠班不特止，連搵個入波都好難；踢咗9場日乙，只對同樣喺日乙新丁嘅岡山綠雉身上攻入1球，其餘8仗就交白卷，即係可以大膽咁講，只要櫪木SC失波，就一定冇得贏。今次作客嘅甲府風林絕非善類，排名日乙第3，近3仗都贏波，擊敗對手如東京綠茵、FC橫濱都有一定名氣，今次對手轉弱，可望輕鬆取勝，博客軍炒雙蛋，揀2:0呢個熱膽。
串阿積士勝「主其他」
有熱膽後，就搵啲有分頭比賽；荷甲方面，阿爾克馬爾（AZ）就篤定捧盃，周日作客阿積士，球員慶祝完，相信都玩到喪；相反阿積士要爭聯賽次席，可以來季踢歐聯，收入爭好遠；AZ無謂阻人發達，阿積士班o靚仔入開波就停唔到，博30倍「主其他」不為過份。
尾關方面，就揀奧特格寧蘭主場對華拉倫加開2:2波膽；上星期馬會將洛辛堡對奧特格寧蘭呢場波，入球中立數開到3.5球，結果踢成1:1，開入球「細」，唔少人都跌眼鏡。不過今次奧特格寧蘭返主場，攻力相信好番啲，而華拉倫加亦十分硬淨，未必輸得，2:2波膽有11倍，串得過。文：牽牛