上個禮拜度假身處曼谷，有日去咗做spa，離開先發現百貨公司因為戒嚴閂晒，改去夜市。一直遇唔到示威，返到酒店見到十幾個疑似軍人，心諗唔通真係咁緊張？點知Reception話：「公主嚟咗飲嘢，呢啲係隨從。」想去裝吓公主咩樣，但被疑似軍人好禮貌咁拒絕。後來公主座駕離開，警察封咗條街，搞到深夜12點都大塞車，但司機毫無怨言，如果喺香港，仲唔響爆horn咩﹗
顏色衫軍唔會去示威
「因為泰國人最尊重皇室成員。」泰國通胡慧沖話，曼谷噚日再出現示威，港客如果改唔到行程，到咗曼谷又唔想留喺嗰度，可以去兩三個鐘車程外嘅華欣，因為呢度「紅橙黃綠青藍紫」衫軍都唔會去示威：「因為泰皇大部份時間住喺呢度，邊個敢嚟搞搞震。」華欣以陽光海灘為主，曼谷包車去大約要3,000至4,000泰銖，大約港幣600幾至800幾左右。佢話近來唔少港人轉去布吉，「搞到淡季嘅機票酒店，好似旺季咁貴」，大家可以諗吓去蘇梅島。
泰國通話留喺曼谷，要上佢個網update示威位置，避免接近，同埋喺便利店買sim卡做聯絡：「泰國sim卡聽電話唔收費，屋企人打畀你可以講足成日。」佢又話遊客大減，百貨公司開始大減價至四、五折，因為當地人消費力弱，太貴冇生意。佢話，今次示威比較溫和，但呢啲嘢冇人敢寫包單，仲要睇局勢發展，大家要諗清楚去唔去。
電郵：mailto:[email protected]