從政嘅人置身「熱廚房」習以為常，但唔代表烹飪了得，政客靠把口搵食，亦唔一定係廚神，扶康會邀請多個立法會議員同小朋友一齊煮嘢食宣傳傷健共融訊息，請咗《美女廚房》周中師傅做評判，平時成日硬啃「美女廚神」出品嘅周中師傅，今次真係難為晒。
陳淑莊雲吞搶手
幾個議員出場時似模似樣，但邊個有真材實料，一出手就獻醜，白鴿黨卿姐整合桃糊芝麻湯圓，表面睇湯圓無異樣，但一擺入口就唔掂。
因為湯圓皮同高官面皮一樣咁厚，可能厚過陳一諤㖭，卿姐亦唔死撐，承認廚藝「有好大改善空間」，立會「地獄廚神」非佢莫屬。
公民黨陳淑莊Tanya十指不沾陽春水咁樣，估唔到入廚有板有眼，噚日包雲吞手勢純熟，雲吞煮好後上枱，瞬即被人掃光。Tanya話包雲吞係外婆拿手菜，佢自細跟外婆學嘢，得到真傳手藝，總算無失禮人。
立法會主席曾鈺成表演炒雞柳，一睇就知佢平時遠離廚房，佢亦坦言甚少下廚，政客都係注定整色整水叻過整嘢食。